Foydalanuvchi kelishuvi

Tahrir sanasi: 20-oktabr, 2026

1. 1. Umumiy qoidalar

   Ushbu Kelishuv O‘zbekiston Respublikasi Fuqarolik kodeksining 369-moddasiga muvofiq Tipzy platformasi operatorining (keyingi o‘rinlarda «Operator») ommaviy ofertasi hisoblanadi va tipzy.uz sayti hamda Tipzy Telegram-botidan (keyingi o‘rinlarda «Platforma») foydalanuvchi har qanday shaxsga qaratilgan. Kelishuv shartlari asosida tuziladigan shartnoma qo‘shilish shartnomasi hisoblanadi (Fuqarolik kodeksining 360-moddasi).

   Ofertaning aksepti unda ko‘rsatilgan harakatlarni amalga oshirish hisoblanadi (Fuqarolik kodeksining 370-moddasi): kreator sifatida ro‘yxatdan o‘tish, donat yuborish yoki Platformaning boshqa funksiyalaridan foydalanish. Aksept qilingan paytdan boshlab shartnoma Kelishuv shartlari asosida tuzilgan hisoblanadi.

   Taraflarning munosabatlari O‘zbekiston Respublikasining Fuqarolik kodeksi, 2022-yil 29-sentyabrdagi O‘RQ-792-son «Elektron tijorat to‘g‘risida»gi Qonuni, 2019-yil 2-iyuldagi O‘RQ-547-son «Shaxsga doir ma’lumotlar to‘g‘risida»gi Qonuni va boshqa qonunchilik hujjatlari bilan tartibga solinadi.

   Kelishuv o‘zbek va rus tillarida tuzilgan. Matnlar o‘rtasida tafovut bo‘lsa, davlat tilidagi matn ustun hisoblanadi.

2. 2. Atamalar

   • Kreator: donatlar olish uchun Platformada ro‘yxatdan o‘tgan jismoniy shaxs.
   • Tomoshabin: kreatorga donat yuboruvchi shaxs.
   • Donat: tomoshabinning Platforma orqali kreatorga ixtiyoriy va beg‘araz pul o‘tkazmasi.
   • Kreator sahifasi: tipzy.uz/username manzilidagi ommaviy sahifa bo‘lib, u orqali donatlar qabul qilinadi.
   • To‘lov hamkori: O‘zbekiston Respublikasi Markaziy bankining litsenziyasiga ega bo‘lgan, to‘lovlarni amalga oshiradigan va donatlarni kreatorlarga o‘tkazadigan to‘lov tashkiloti.
   • Shaxsiy kabinet: kreator kirganidan keyin unga ochiladigan Platforma bo‘limi.

3. 3. Kelishuv predmeti

   Operator kreatorga sahifa yaratish va donatlarni qabul qilish, tomoshabinga esa kreatorlarga donat yuborish uchun texnik imkoniyat taqdim etadi.

   Donat tovarlar, ishlar yoki xizmatlar uchun to‘lov hisoblanmaydi va kreatorda tomoshabin oldida majburiyat keltirib chiqarmaydi.

   Operator tomoshabin va kreator o‘rtasidagi munosabatlarning tarafi emas, bank yoki to‘lov tashkiloti hisoblanmaydi va tomoshabinlarning pullarini o‘z hisobiga qabul qilmaydi. To‘lovlarni to‘lov hamkori amalga oshiradi: donat summasi avtomatik ravishda kreator hisobiga va komissiya hisobiga taqsimlanadi.

4. 4. Kreatorni ro‘yxatdan o‘tkazish

   18 yoshga to‘lgan, muomalaga layoqatli va o‘zini o‘zi band qilgan maqomiga ega jismoniy shaxs kreator bo‘lishi mumkin.

   Ro‘yxatdan o‘tish Tipzy Telegram-boti orqali amalga oshiriladi: kreator telefon raqamini tasdiqlaydi va familiyasi, ismi va otasining ismini ko‘rsatadi. Kreator taqdim etilgan ma’lumotlar haqqoniy ekani va unga tegishli ekanini kafolatlaydi.

   Donatlarni qabul qilishni boshlash uchun kreator shaxsiy kabinetdagi qo‘llanma bo‘yicha sozlashni, jumladan to‘lov hamkorida hisobni ulashni yakunlaydi.

   Bir shaxs bitta kreator akkauntiga ega bo‘lishi mumkin. Kreator akkauntga kirish huquqini uchinchi shaxslarga bermaydi, o‘z akkaunti orqali amalga oshirilgan harakatlar va Telegram akkauntining xavfsizligi uchun javob beradi.

   Havoladagi foydalanuvchi nomi uchinchi shaxslarning huquqlarini buzmasligi, chalg‘itmasligi yoki haqoratli iboralarni o‘z ichiga olmasligi kerak. Operator uni o‘zgartirishni talab qilishga haqli.

5. 5. Donatlar va hisob-kitoblar

   Donat summasini tomoshabin to‘lov hamkori limitlari va qonunchilik doirasida belgilaydi. To‘lov to‘lov hamkori qo‘llab-quvvatlaydigan to‘lov tizimlarining bank kartalari orqali amalga oshiriladi; karta ma’lumotlari uning tomonida kiritiladi.

   Operator tomoshabindan qo‘shimcha komissiya olmaydi. Donat summasidan Operator komissiyasi va to‘lov hamkori komissiyasi ushlab qolinadi; ularning miqdori donatlarni qabul qilish boshlanishidan oldin shaxsiy kabinetda ko‘rsatiladi.

   Pul to‘lov hamkori belgilagan tartibda donat qilingan kuni kreator hisobiga o‘tkaziladi. O‘tkazish muddatlari banklar ishiga bog‘liq bo‘lishi mumkin.

   Donat beg‘araz hisoblanadi va xato yoki ruxsatsiz yechib olingan hollar bundan mustasno, qaytarilmaydi. Bunday hollarda tomoshabin Operatorga yoki kartani chiqargan bankka murojaat qiladi; qaytarish to‘lov qanday usulda amalga oshirilgan bo‘lsa, o‘sha usulda amalga oshiriladi. Kreator to‘lov e’tiroz qilinganda tegishli summa to‘lov hamkori belgilagan tartibda ushlab qolinishi mumkinligiga rozi bo‘ladi.

   Kreator o‘z soliq majburiyatlarini bajarish uchun mustaqil javob beradi. Qonunchilikda nazarda tutilgan hollarda soliqni to‘lov tashkiloti soliq agenti sifatida ushlab qoladi.

6. 6. Nimalar taqiqlanadi

   Platformadan foydalanishda quyidagilar taqiqlanadi:

   • O‘zbekiston Respublikasi qonunchiligini buzish;
   • zo‘ravonlik, ekstremizm, terrorizmni targ‘ib qiluvchi yoki adovat qo‘zg‘atuvchi materiallarni joylashtirish;
   • pornografik materiallarni va voyaga yetmaganlar ishtirokidagi har qanday jinsiy xususiyatdagi materiallarni joylashtirish;
   • tomoshabinlarni chalg‘itish, boshqa shaxslar yoki tashkilotlar nomidan yoxud qonuniy asoslarsiz xayriya uchun pul yig‘ish;
   • qimor o‘yinlari, lotereyalar, garovlar va moliyaviy piramidalarni tashkil etish;
   • Platformadan jinoiy faoliyatdan olingan daromadlarni legallashtirish yoki terrorizmni moliyalashtirish uchun foydalanish;
   • intellektual mulk huquqlari va shaxsiy hayot daxlsizligini buzish;
   • Platforma ishiga aralashish, himoya vositalarini chetlab o‘tish va ma’lumotlarni avtomatik yig‘ish.

7. 7. Operatorning huquq va majburiyatlari

   Operator Platforma ishini ta’minlaydi, biroq uning uzluksizligini kafolatlamaydi: texnik ishlar va nosozliklar, jumladan to‘lov hamkori va Telegram tomonida bo‘lishi mumkin.

   Operator kreatordan shaxsini va o‘zini o‘zi band qilgan maqomini tasdiqlovchi ma’lumot va hujjatlarni so‘rashga haqli.

   Operator Kelishuv yoki qonunchilik buzilganda, firibgarlikka asosli shubha bo‘lganda, shuningdek vakolatli davlat organlarining talabiga ko‘ra kreator sahifasi ishini to‘xtatib turishga yoki akkauntni bloklashga haqli. Agar qonunchilikda taqiqlanmagan bo‘lsa, Operator kreatorni bloklash va uning sabablari haqida xabardor qiladi.

   Operator Platforma funksiyalarini rivojlantirish va o‘zgartirishga haqli.

8. 8. Intellektual mulk

   Kreator o‘z sahifasiga joylashtiradigan materiallarga bo‘lgan huquqlarni saqlab qoladi va Operatorga ularni joylashtirish muddatida Platforma ishlashi maqsadida Platformada takrorlash va ko‘rsatish uchun beg‘araz noeksklyuziv litsenziya beradi.

   Dasturiy ta’minot, dizayn va Tipzy belgisi Operatorga tegishli.

9. 9. Javobgarlik

   Taraflar O‘zbekiston Respublikasi qonunchiligiga muvofiq javobgar bo‘ladi.

   Operator kreatorlar sahifalarining mazmuni, kreatorlarning tomoshabinlarga bergan va’dalarini bajarishi, to‘lov hamkori, banklar, Telegram va aloqa tarmoqlari ishidagi nosozliklar, shuningdek foydalanuvchi o‘z akkauntiga kirish huquqini uchinchi shaxslarga berishi oqibatlari uchun javob bermaydi.

   Taraflar yengib bo‘lmaydigan kuch holatlari tufayli majburiyatlarni bajarmaganlik uchun javobgarlikdan ozod qilinadi.

10. 10. Shaxsga doir ma’lumotlar

    Foydalanuvchilarning shaxsga doir ma’lumotlari Kelishuvning ajralmas qismi bo‘lgan Maxfiylik siyosatiga muvofiq qayta ishlanadi.

11. 11. Kelishuvning o‘zgarishi

    Operator Kelishuvni o‘zgartirishga haqli. Yangi tahrir ushbu sahifada sanasi ko‘rsatilgan holda e’lon qilinadi. Agar qonunchilikda boshqa muddat belgilanmagan bo‘lsa, kreatorlarga taalluqli o‘zgarishlar haqida Operator ularni Platforma yoki Telegram-bot orqali o‘zgarishlar kuchga kirishidan kamida 30 kun oldin xabardor qiladi.

    O‘zgarishlar kuchga kirgandan keyin Platformadan foydalanishni davom ettirish yangi tahrirga rozilikni anglatadi. Agar kreator o‘zgarishlarga rozi bo‘lmasa, u Platformadan foydalanishni to‘xtatishga va akkauntni o‘chirishga haqli.

12. 12. Amal qilish muddati va tugatish

    Kelishuv muddatsiz amal qiladi. Kreator istalgan vaqtda Operatorga murojaat yuborib, Platformadan foydalanishni to‘xtatishi va akkauntni o‘chirishi mumkin. Operator Kelishuv buzilganda kreator bilan shartnomani bekor qilishga haqli.

    Shartnoma tugatilgunga qadar qabul qilingan donatlar bo‘yicha hisob-kitoblar odatiy tartibda yakunlanadi.

13. 13. Savollar va murojaatlar

    Agar savolingiz yoki e’tirozingiz bo‘lsa, bizga «Kontaktlar» sahifasidagi shakl orqali yozing. Murojaatingizni ko‘rib chiqib, 30 kun ichida javob beramiz.